வில்லாதி வில்லன் வீரப்பன் – விமர்சனம்

ராம்கோபால் வர்மாவின் இயக்கத்தில், தடை பல கடந்து ஒரு வழியாக வெளிவந்திருக்கிறது ‘சந்தன மர கடத்தல் மன்னன்’ வீரப்பனின் இருட்டடிக்கப்பட்ட வரலாறு!

கடந்த பத்து வருடத்திற்கு முன், சுமார் இருபது ஆண்டுகளுக்கும் மேலாக தமிழகம் மற்றும் கர்நாடகா இரண்டு ஊர் போலீஸ் மற்றும், அரசாங்கத்திற்கும் சிம்ம சொப்பனமாக விளங்கிய ‘காட்டு ராஜா’வீரப்பன், இரு மாநிலங்களாலும் ஒருங்கிணைக்கப்பட்ட ஸ்பெஷல் அதிரடிப்படை போலீஸுக்கு எப்படி, எப்படியெல்லாம் சிம்ம சொப்பனமாக விளங்கினான் ? இறுதியில், அவனையும், அவன் கூட்டாளிகளையும், எப்படி போலீஸ் பழிவாங்கியது..? என்பதை இயக்குனர் ராம்கோபால் வர்மா தன் ஸ்டைலில் இயக்கிட தற்போது, வந்திருக்கும் படம் தான் ‘வில்லாதி வில்லன் வீரப்பன்.’

வீரப்பன் ஸ்டோரியில் கொஞ்சம், ஜாஸ்தியாகவே கற்பனை கலந்து, ஏகத்துக்கும் இல்லாத பொல்லாத விஷயங்களை வீரப்பன் தான் தற்போது உயிரோடு இல்லையே…. எங்கே தன்னை கேட்கப் போகிறான்? எனும் நெஞ்சுரத்தில் படம் பிடித்திருக்கிறாரோ ராம்கோபால் வர்மா. என கேட்கும் அளவிற்கு எக்கச் சக்க காட்சிகள் படத்தில் இடம் பெற்றுள்ளன குறிப்பிட்டு சொல்வதென்றால், ‘பெற்ற குழந்தையையே தான், காட்டில் ஒளிந்திருக்கும் போது, அதிரடி படையிடமிருந்து தப்பிப்பதற்காக கழுத்தை திருகி கொன்றவன், வீரப்பன்… என்றும், வீரப்பனின் மனைவி முத்துலட்சுமி, அவனால், கொல்லப்பட்ட போலீஸ் அதிகாரி ஒருவரது மனைவியின் வீட்டில், போலீஸ் ஏற்பாட்டின்படி வாடைக்கு குடியேறியிருந்தார்….. என்றும், வீரப்பன் தன், இறுதி நாட்களில் விடுதலை புலிகள்தலைவர் பிரபாகரனை போற்றி புகழ்ந்ததாகவும், அந்த புகழ்ச்சியினூடே இந்திய முன்னாள் பிரதமர் ராஜிவ் காந்தியை கொன்றது, பிரபாகரன் தான்… என வீரப்பனே சொல்வதாகவும், இறுதியில், பிரபாகரனை சந்திக்க ஆம்புலன்சில் தன் கூட்டாளிகளுடன் கிளம்பிய போது தான், வீரப்பன், அதிரடிப்படையினரால் சுட்டுகொல்லப்பட்டதாகவும் தன் இஷ்டத்திற்கு இயக்குனர் ராம்கோபால் வர்மா, காட்சிப்படுத்தியிருப்பது தான் சற்று அதிகமாகவே இருக்கிறது.

கதையின் நாயகராக அச்சு அசல் வீரப்பனாக, தமிழுக்கு புதுமுகம் சந்தீப் பரத்வாஜ், பக்காவாக பொருந்தி நடித்திருக்கிறார். சிங்கத்தயே சீண்டி பார்க்க றீயா… உன் சாவ பார்த்து சாத்தான் கூட பயந்து ஒடணும்… என ஆரம்பத்தில் ஒருபோலீஸ் ஸ்டேஷனை சூறையாடி அந்த போலீஸ் அதிகாரியை கொடூரமாக கொலை செய்வதில் தொடங்கி, சீறும்சிறுத்தையை ஒரு கழியால் துரத்துவது, காட்டு யானைகளை தன் வேட்டைதுப்பாக்கியால் போட்டுத் தள்ளி விட்டு தந்தம் எடுப்பது… இறுதியில் முறுக்கு மீசையை சற்றேமழித்துக் கொண்டுதன், கூட்டாளிகளுடன போலீஸின் வஞ்சகம் தெரியாமல் ஆம்புலன்ஸில் ஏறிக் கிளம்பி சரமாரியான துப்பாக்கித் தோட்டாக்களுக்கு இரையாகி உயிரை விடுவது வரை வீரப்பனாகவே வாழ்ந்திருக்கிறார் புதியவர் சந்தீப்.

அதி ரடிப்படை அதிகாரியாக சச்சின் ஜெ.ஜோசி, “நம்ம கிட்ட நிறைய போர்ஸ் இருக்கு. அதற்காக ஒரு எறும்ப பிடிக்க பெரிய படையை இறக்குறதில் என்ன சார் இருக்கு? வெறும் செருப்பு போட்டு கிட்டு15 – 20 பேருடன் சுத்திகிட்டு பழங்காலத்து ரைபிளுடன் நம்மாளுங்க நிறைய பேரை வீரப்பன் போட்டு தள்ளியிருக்கான் அதற்கு நிறைய போலீஸ் போர்ஸைக் காட்டிலும் புத்திசாலித்தனம் தான் வேண்டும் என உயர் அதிகாரியிடம் வாதம் பண்ணுவதில் தொடங்கி, இந்திரா காந்தியை ஒரு டெரரிஸ்ட்டா கொன்றான் அவரது பாதுகாப்பு படை வீரர் தானேசுட்டுக் கொன்றான்…. என தன் சகாவுக்கு தம் படைவீரர்கள் மீதும் சந்தேகம் இருப்பதை நியாயப்படுத்துவது வரை “நச்” சென்று நடித்திருக்கிறார்.

முத்துலட்சுமியாக வரும் உஷா ஜாதவ், வீரப்பனால் கொல்லப்பட்ட போலீஸ் அதிகாரியின் மனைவியாக வரும் லிசாரே உள்ளிட்ட இருவரும் நன்றாக நடித்திருந்தாலும் அவர்கள் இருவரும் சம்பந்தப்பட்ட பெரும்பாலான காட்சிகள் நாடகத்தன்மையுடனே நகர்வது குறை. அதிலும், கிராமத்து பெண்ணான முத்துலட்சுமிக்கு, புருஷனை கொன்ற வீரப்பனை பழி வாங்க காத்திருக்கும் லிசாரேயுடன் முத்துலட்சுமி சூப் சாப்பிடுவதெல்லாம், இப்படத்திற்கும், கதைக்கும் தேவைப்படாத இல்லாத மிகையான காட்சிகள்.

“இப்ப, மீடியா கிட்ட என்ன சொல்றது…. வீரப்பனை பிடிக்க போட்ட பிளான் எங்களை விட அவனுக்கு நல்லாத் தெரியும்ன்னு… சொல்லவா…” என கொதிக்கும் உயரதிகாரியின் நடிப்பில் தொடங்கி, மதானி, குமார், உள்ளிட்ட பாத்திரங்களின் நடிப்பும், துடிப்பும் நன்றாகவே இருக்கிறது.

ஆலன் அமீனின் அதிரடி ஆக்ஷன் காட்சிகளும், கொஞ்சம் நீளம் என்றாலும், அன்வர் அலியின் ரசிகனை படுத்தாத படத்தொகுப்பும் அனிகித்கந்தகேலின் பிரமாண்ட ஒளிப்பதிவும், ஜான்ஸ்டீவர்ட் & யதுரியின் பின்னியெடுக்கும் பின்னணி இசையும் ஜீத் கங்குலியின் மிரட்டல் இசையும் இப்படத்திற்கு பலம் சேர்த்திருக்கின்றன.

ஆனாலும், “ரஜினி, காஞ்சி சாமி… இப்படி பெரிய மினிஸ்டர் எல்லாத்தையும் கடத்தணும்.. “என வீரப்பன் பேசுவது மாதிரியான தவறான மீனிங் லஸ் டயலாக்குகள்…. பலவீன மென்றாலும், வீரப்பனின் மனைவி முத்துலட்சமி, “எனக்கு கல்யாணம் ஆயிடுச்சு. ஆனா விதவை வாழ்க்கைதான்…” என ப் பரிதாபமாய் பேசுவது, ‘ஒரு ராட்சஷனை அழிக்க அவனை விட பெரிய ராட்சஷனாக உருவெடுக்கணும்… ‘ என க்ளைமாக்ஸில் அதிரடிப்படை அதிகாரி சச்சின் ஜோசி டயலாக் அடிப்பது… ஆகிய ஒரு சில காட்சிகள் சினிமாடிக்காக இருப்பது இந்தப் படத்திற்கு பலமே.

படம் முழுக்க வீரப்பன் பற்றி வரும் சில தேவையற்ற பொய்கள், சென்சாரையும், போலீஸையும் திருப்திபடுத்த புரட்டாக புகுத்தப்பட்ட காட்சிகள் என்றாலும் போலீஸின் பொல்லாத முகத்தையும் காட்டத் தவறவில்லை… இந்தியாவையே தன் இன்னும் பிற படங்களால் திரும்பி பார்க்க வைத்த இயக்குனர் ராம்கோபால் வர்மா என்பது ஆறுதல்! ”என்னைப் பொறுத்தவை ரை முட்டாள் கொலைகாரன் இருவருக்கும் இந்த உலகத்தில் வாழத் தகுதி இல்லை…. ”எனும் அதிரடிப்படை அதிகாரியின் தத்துவம், ”விபீஷிணன், இராவணன்” உள்ளிட்ட இதிகாச கால அசுரர்களையெல்லாம் உதாரணம் காட்டும் வீரப்பன்…. இது எல்லாம் ராம்கோபாலின் இந்த வீரப்பன் படத்தில் புதுசாக இருக்கிறதென்பது மேலும் ஆறுதல்…..!

அதே மாதிரி, இயக்குனர் ராம்கோபால் வர்மா, இப்பட ஆரம்பத்தில் வீரப்பனை மிகக் கொடூர மனிதனாக சித்தரித்திருந்தாலும் அவனின் மனிதாபிமானத்தையும், மக்கள் மீதான நம்பிக்கையையும், அவனை பிடிக்கும் விஷயத்தில் போலீஸின் போக்கிரி தனங்களையும், கிடைத்த கேப்பில் எல்லாம் சொல்லாமலும் இல்லை.

மொத்தப் படத்திற்கும், ”வில்லாதி வில்லன் வீரப்பன்,’ என டைட்டில் சூட்டப்பட்டிருந்தாலும் ராம்கோபால் வர்மாவின் இயக்கத்தில், ஒரு மாதிரி, கதாநாயகனாகவே தெரிகிறான வீரப்பன் என்பது விசித்திரம்!”

ஆகவே ”வில்லாதி வில்லன் வீரப்பன் ‘- ‘வசூல் நாயகன்’ ஆனாலும் ஆச்சரியப்படுவதற்கில்லை