அரசியலில் இருந்தாலும் தொடர்ந்து நடிப்பேன் : சரத்குமார்…

நடிகர் சரத்குமார் தற்போது தீவிர அரசியலில் இறங்கிவிட்டார். ஒன்றிரண்டு படங்களை தவிர தற்போது முழு நேரமும் அரசியலில் கவனம் செலுத்தி வருகிறார். சமீபத்தில் ஜி.வி.பிரகாஷ் நடிக்கும் ‘அடங்காதே’ படத்தில் முக்கிய கதாபாத்திரத்தில் நடிக்க சரத்குமார் ஒப்பந்தமாகியுள்ளார்.

இந்நிலையில், பத்திரிகையாளர்களை சந்தித்து பேட்டி அளித்த சரத்குமார் கூறும்போது, நான் அரசியலில் ஈடுபட்டிருந்தாலும் படங்களில் நடிப்பதில் தீவிரமாக இருக்கிறேன். நல்ல கதை நல்ல கதாபாத்திரங்களை தேர்வு செய்கிறேன்.

வாழ்க்கையில் உயர்வும் தாழ்வும் சகஜமானதுதான். அது எல்லோருக்கும் ஏற்படும். சைக்கிளில் இரு பெடல் மாதிரி ஒன்று மேலே வரும்போது மற்றொன்று கீழே இறங்கிதான் ஆகும். ஆனால் நான் அந்த சைக்கிளை தொடர்ந்து ஓட்டாமல் திடீர் என்று கீழே இறங்கிவிட்டேன். அதை இப்போது உணர்கிறேன்.

இப்போது ஜி.வி.பிரகாசும் நானும் இணைந்து ஒரு படத்தில் நண்பர்களாக நடிக்கிறோம். சண்முகம் முத்துசாமி இயக்குகிறார். இதேபோல் கன்னடத்தில் நடிகர் புனித்ராஜ்குமாரும் நானும் இணைந்து ‘ராஜகுமாரா’ என்றபடத்தில் நடிக்கிறோம். இந்த படம் முடிந்து விரைவில் திரைக்கு வரவிருக்கிறது.

இன்னும் இரண்டு படங்களில் நடிக்க கதை கேட்டுவருகிறேன். இனி தொடர்ந்து படங்களில் நடிப்பதில் கவனம் செலுத்தப் போகிறேன்.

இவ்வாறு அவர் கூறினார்.